| Մի խումբ հնագետներ մեքսիկական Սան Խուան Եվանգելիստա քաղաքում իրականացրած պեղումների արդյունքում հայտնաբերել են կնոջ 1.600-ամյա կմախք, որն ունի մի շարք ուշագրավ առանձնահատկություններ:
Ինչպես նշում է The Daily Mail-ը, ըստ մասնագետների, կնոջ գանգոսկրն ունի մարդկային ցեղին ոչ բնորոշ ձև: Բացի այդ, դրա վրա շատ լավ պահպանվել են ատամները, որոնց վրա, ի զարմանս հնագետների, կան զարդեր:
Հետաքրքրական է նաև այն փաստը, որ կնոջ ստորին ատամնաշարի առջևի ատամներից մեկի փոխարեն դրված է կանաչ քարից պատրաստված «իմպլանտ»:
Բրիտանական աղբյուրը մանրամասնում է, որ կնոջ կմախքային առանձնահատկությունները վկայում են այն մասին, որ նա տվյալ տեղանքից չէ ու եղել է օտարերկրացի:
Ըստ մասնագետների՝ մահվան պահին կինը եղել է 35-40 տարեկան: Ենթադրվում է, որ նա զբաղեցրել է սոցիալական բարձր դիրք:
|
